זונטאג פ' תצוה • ב' אדר תשפ"ה | בחצרות הקודש
בילדער קרעדיט: י. שטיין
פארגאנגענעם דאנערשטאג נאכמיטאג בעצם יומא דהילולא קדישא פון הגה"ק בעל קדושת יום טוב מסיגעט זי"ע איז כ"ק אדמו"ר מסאטמאר אריינגעקומען צו די זאלן בביתו נאוה קודש אין קרית יואל ווי דער רבי האט מעריך געווען שלחנו הטהור לכבוד די יארצייט אינאיינעם מיט תלמידי ישיבה קטנה סניף דרכי התורה ד'סאטמאר פון מאנסי בהנהלת הר"ר שאול פערלשטיין שליט"א.
דער רבי האט זיך געוואשן צום סעודה און מען האט אויפגעגעבן אלע מאכלים אזוי ווי יו"ט, במשך די סעודה האט מען מאריך געווען מיט ניגוני התעוררות, דערנאך האט דער רבי משמיע געווען דברות קודש, דער רבי ארומגערעט איבער די גדלות פונעם בעל הילולא זי"ע, זיין הרבצת התורה לתלמידים, זיין יראת שמים, זיין כח הנהגה, און פארציילט עטליכע סיפורים און ענינים שונים. דאן האט דער רבי האט ארויסגעברענגט לשבח פון די תלמידי הישיבה וועלכע האבן זיך מקבל געווען נישט צו רעדן קיין שיחת חולין מיט די תפילין און נאך אנדערע קבלות טובות בעניני תורה ותפילה, און מסיים געווען מיט ברכות לרוב פאר אלע פארזאמלטע רבנן ותלמידהון.
נאכן בענטשן האט דער מנהל הישיבה איבערגעגעבן א כוללות קוויטל מיט די נעמען פון די בחורים וואס האבן זיך אויסגעצייכנט מיט שעות רציפות במשך די ימי השובבים העעל"ט און דער רבי האט פארטיילט פאר די בחורים א מתנה דעם נייעם ספר ברך משה על סוגיות הש"ס.
דורכאויס די יומא דהילולא איז דער רבי שליט"א צוגעגאנגען צו אלע תפילות פארן עמוד, אנגעהויבן ביי מעריב, דערנאך ביי תפילת שחרית אין די ישיבה קטנה סניף קדושת יום טוב על שמו ולזכרו פונעם בעל ההילולא און נאכמיטאג ביי תפילת מנחה בביתו נאוה קודש.
