זונטאג פ' דברים • כ"ז תמוז תשפ"ו | בחצרות הקודש
אין די טעג גרייט זיך כ"ק אדמו"ר מפשעווארסק שליט"א ארויסצופארן קיין דייטשלאנד, וואו ער וועט זיך אויפהאלטן במשך די קומענדיגע זומער-וואכן.
ווי באקאנט, פארט דער רבי שליט"א יעדעס יאר ארויס אין די זומער-חדשים קיין פראנקרייך, וואו דער רבי האט זיך אויפגעהאלטן למנוחת הנפש. היי יאר אבער ווען הרבנית הצדקנית מפשעווארסק תליט"א, געפונט זיך אין דייטשלאנד לצרכי רפואה האט דער רבי שליט"א באשלאסן צו פארן קיין דייטשלאנד, צו וויילן נעבן די רביצין שתחי'.
לכבוד דעם באזוך האבן עסקנים ארויסגעדינגען א פאסיגע דירה נישט ווייט פונעם שפיטאל אין שטאט עסען, מיט אלע נויטיגע איינריכטונגען פאר'ן רבי'ן שליט"א וכל הנלווים אליו.
אויך האט מען אויסגעארבעט מנינים פאר אלע תפילות, סיי בימות החול און סיי במשך די שבתים, כדי דער רבי שליט"א זאל קענען ממשיך זיין מיט די עבודת הקודש ווי געווענליך.
היינט אויפדערנאכט ביים שמחת הבר מצוה פון אן אייניקל ביים רבי'ן שליט"א אינעם גרויסן פשעווארסקער ביהמ"ד אין אנטווערפן, וועט דער רבי שליט"א משמיע זיין דברי פרידה פאר די חסידים, איידער ער לאזט זיך ארויס דעם קומענדיגן דינסטאג אויף דער לענגערער נסיעה, וועלכע איז ערווארטעט אנצוהאלטן ביז אנהייב חודש אלול.
