מאנטאג פ' שמות • ט"ז טבת | בחצרות הקודש
מיט א פרישן שטראם פון שמחה וחדוה האבן אלפי חסידי סאטמאר מיטגעהאלטן די הערליכער שמחה בחצר הקודש, די חתונה פון אן אייניקל ביי כ"ק אדמו"ר מסאטמאר שליט"א, וואס איז אפגעראכטן געווארן אויף א געהויבענעם שטייגער, וחסידים ברינה יגילו, אינעם היכל ביהמ"ד הגדול דקרית יואל, וואס איז געווארן ספעציעל איינגערישט צו אקאמאדירן דעם גרויסן ציבור פון נאנט און ווייט וואס זענען געקומען מיטצוהאלטן די געהויבענע שמחה.
בשטומ"צ איז געגאנגען אונטער די חופה דער חתן א זון פון רבינס בן זקונים הגה"צ רבי יואל טייטלבוים שליט"א רב דביהמ"ד בית ברוך אין קרית יואל, איידעם ביי הגה"צ אבד"ק בערטש שליט"א, מיט די כלה תחי', טאכטער פון הגה"צ רבי ישראל אברהם אלטר טויב שליט"א אבד"ק תולדות נפתלי קאלוב בארא פארק, זון פון הגה"צ רבי נפתלי ארי' לייבוש זצ"ל מקאלוב און איידעם ביי כ"ק אדמו"ר משאץ וויליאמסבורג זצ"ל.
דער זמן השמחה, וואס איז אפגעראכטן געווארן מיטוואך למחרת עשרה בטבת, האט ארויפגעברענגט נאסטאלגישע זכרונות ביים ציבור חסידי סאטמאר פון די ימי השמחה במעון הקודש, די געבורט, חאלאקע און בר מצווה פונעם איצטיגן אבי החתן שליט"א וואס זענען אלע פארגעקומען אין די זעלבע טעג ארום עשרה בטבת מיט יארן צוריק, און אצינד האלט מען שוין ב"ה ביי די ווייטערדיגע דורות, ווען דער רב שליט"א האט געפירט אונטער די חופה זיין דריטע קינד, וואס איז געווען א געהויבענע געלעגענהייט זיך משמח צו זיין בשמחה וגילה לכבוד דעם שמחת בית צדיקים.
אין בעפארגרייטונג צו די גרויסע חתונה איז דער היכל ביהמ"ד הגדול ספעציעל אויסגעשטעלט געווארן מיט א פרישן פארגרעסערטן אויסשטעל, מיטן אויסצוברייטערן דעם ביהמ"ד, און ארייננעמען ביי די ריקודין אויך דעם דרום פליגל פונעם ביהמ"ד, מיט פרישע הונדערטער פלעצער אויף די פארענטשעס אויף אלע דריי זייטן פון די היכלות.
ביום החופה נאכמיטאג איז די רבי שליט"א ערשינען אין ביהמ"ד הגדול צד דרום צו תפילת מנחה. נאך מנחה איז דער גאנצער ציבור זקנים עם נערים אריבער לברך ולהתברך און מקבל זיין ברכת קדשו ביום שמחת לבו. דאן איז די רבי אריינגערומען צום מעמד קבלת פנים בהיכל ביהמ"ד הגדול, וואו מען האט געזינגען ווארימע ניגוני התעוררות ודביקות. האברך ר' שמעון עסטרייכער הי"ו האט אויפגעטרעטן מיט חרוזין און דברי כיבושין, און אויסגערעכנט די גרויסע יחוס פון די חתן כלה און די דערהויבענע זיידעס וואס קומען אראפ זיך מיטפרייען ביי די שמחה. ביים קבלת פנים האט זיך אויך משתתף געווען כ"ק אדמו"ר מווויזניץ מאנסי שליט"א.
די רבי האט געטרונקען לחיים, אנגעוואונטשן פארן חתן, מחותנים, חשוב'ע זיידעס און פארן גאנצן ציבור, און דערנאך משמיע געווען ווארעמע דברות קודש ודברי כיבושין מעורר צו זיין זכות אבות, און צוגעענדיגט מיט ברכות לרוב.
נאכן קבלת פנים איז מען געגאנגען צום באדעקן אין די זאלן פון קרן ויואל משה. ביים מעמד החופה אויפן גרויסן באדן פארנט פון ביהמ"ד הגדול, האט די רבי שליט"א מסדר געווען חופה וקידושין, מיט קריאת הכתובה איז מכבד געווארן דער עלטער פעטער כ"ק אדמו"ר מסוליצא שליט"א, מיט ברכות ראשונות דער זיידע הגה"צ רבי נחום מאיר גערמאן שליט"א ר"מ במתיבתא דבאבוב, און מיט ברכה אחריתא דער פעטער כ"ק אדמו"ר מווויזניץ מאנטריאל שליט"א. ביים חופה האט זיך אויך משתתף געווען דער עלטער פעטער כ"ק אדמו"ר מסקווירא שליט"א. נאכן חופה האט די רבי געוואונטשן ברכות הקודש פארן גאנצן ציבור און זיך ארויסגעלאזט אין א מחול לצדיקים.
דאן איז סערווירט געווארן די סעודת החתונה בהיכל ביהמ"ד הגדול, עס איז געווען ספעציעל צוגעגרייטע טישן פאר די מתפללים פון ביהמ"ד בית ברוך ווי די מחותן אבי החתן דינט אלס רב, און די מתפללים פון ביהמ"ד תולדות נפתלי קאלוב ווי די מחותן אבי הכלה דינט אלס רב, אום אכט אזייגער איז די רבי שליט"א ערשינען צום סעודת החתונה ווערנדיג ענטפאנגען לקול תרועת הזמר, און זיך געוואשן צום סעודת החתונה, נאכן פיש האט די רבי געוואונטשן לחיים לכל העם הנאספים, דערנאך בשעת ווען די חתן איז אריינגעקומען איז די רבי געטאנצן מיטן חתן פאר א לענגערע צייט און דערנאך מכבד געווען די זיידעס און מחותנים, און די פעטער כ"ק אדמו"ר מוויזניץ מאנטריאל שליט"א צו טאנצן מיטן חתן, באזונדער איז די רבי געטאנצן מיט בנו הגה"צ אב"ד בית ברוך שליט"א, און דערנאך מיט די גאנצע אויבנאן. דערנאך איז דער ציבור אריבער אל מול פני הקודש וואונטשן מזל טוב און אום 9:30 האט דער רבי פארלאזט די ביהמ"ד, און אהיים לביתו נאוה קודש.
נאך ארום צוויי שעה איז די רבי צוריק ערשינען צום בענטשן. מיט ברכת המזון האט די רבי מכבד געווען מחותנו די זיידע הגה"צ אב"ד בערטש, מיט ברכות ראשונות די פעטער הגה"צ אב"ד סאטמאר 15 שליט"א, און ברכה אחריתא די פעטער כ"ק אדמו"ר משאץ שליט"א.
בדחנא דמלכא הרה"ח ר' מרדכי דוד עסטרייכער שליט"א האט אויסגערופן דעם רבי'ן שליט"א צו די ריקודין מיט ווארימע חרוזים און מעורר געווען זכות אבות הקדושים, דערנאך האט מען ממשיך געווען מיט ניגוני התעורורות, דער רבי האט געמאכט א לחיים און אנגעוואונטשן פארן חתן, מחותנים, וכל העם הנאספים, און דאן אפגעראכטן די ריקודי קודש לפני הכלה בהתלהבות אש פאר א לענגערע צייט, דערנאך געטאנצן מיטן חתן, און דערנאך מיט בנו הגה"צ רב דביהמ"ד בית ברוך שליט"א ובני משפחתו, דערנאך מיט משפחת המלוכה נכדי אביו הרה"ק בעל ברך משה זי"ע, און א באזונדערע פייערליכע טאנץ האט די רבי אפגעראכטן מיט זיין ברודער הגה"צ אב"ד סאטמאר 15 שליט"א.
דערנאך האט מען אויסגערופן צום מצווה טאנץ די זיידעס הגה"צ רבי נחום מאיר גערמאן שליט"א און הגה"צ אבד"ק בערטש שליט"א, דערנאך די מחותן דער אבי החתן הגה"צ רב דביהמ"ד בית ברוך שליט"א, ווען דערביי איז דער רבי געטאנצן א לענגערע צייט מיט בנו די מחותן, דערנאך האט מען אויסגערופן צום מצוה טאנץ די מחותן דער אבי הכלה הגה"צ אבד"ק תולדות נפתלי קאלוב שליט"א.
פארן טאנצן האט די רבי מכבד געווען זיין איידעם הגה"צ רבי העניך אשכנזי אבד"ק אבני צדק צו פארזינגען דעם באקאנטן זמר פונעם קאלובער זיידן "סאל א קאקאש" לעורר זכותו של אותו צדיק וואס איז א זיידע ביי די שמחה. צום שלוס נאך די מצווה טאנץ האט די רבי אנגעוואונטשן פאר די חתן כלה און פארלאזט דעם ביהמ"ד, און ארום 2:15 האט מען פארענדיגט די דערהויבענע שמחה.
